ခေတ်သစ် နွေဦးသို့
ခေတ်သစ် နွေဦးသို့
----------------
မီးတောင်ဝထဲ ခုန်ဆင်းသွားပြီး
ကြယ်အစင်းစင်း ဖြစ်သွားရတဲ့
နွေဦးသူရဲကောင်းတွေကြောင့်
ကြယ်တချို့ ပိုမိုလင်းလက်စွာ
ငါတို့ကို ကြည့်နေမယ်လို့ ငါခံစားရတယ်။
နေထွက်ချိန် နေဝင်ချိန်မတူပေမယ့်
ငါတို့ ဝေဒနာတွေ တူကြတယ်
ဒီနှစ်တွေအတွင်း လူတချို့ဟာ
တိုင်းပြည်အတွက်
မီးတောင်ဝထဲ ခုန်ဆင်းသွားခဲ့ရ
သူတို့ရဲ့ မြင့်မြတ်တဲ့ ပေးဆပ်မှုမှာ
ငါတို့ ဘယ်လိုခရီးဆက်ရမယ်ဆိုတဲ့
လမ်းညွန်ချက်တွေ ချန်ရစ်ခဲ့
အဲဒီလမ်းညွန်ချက် အက္ခရာတွေမှာ
ကိုဂျင်မီဆိုတဲ့ အမည်ပါတယ်
ပုစဉ်းစိမ်းကောင်ရဲ့ ဝမ်းဗိုက်က
ထွက်ကျလာတဲ့ ပျားကောင်တကောင်
သူ့ရင်ဘက်ကို ထွင်းဖေါက်လိုက်လို့
မြေခသွားရတဲ့ သွေးစက်နဲ့အတူ
pdf ရဲဘော်လေး ဟစ်ကြွေးခဲ့တဲ့
"ကမ္ဘာမကြေဘူး" ဆိုတဲ့
အက္ခရာတို့ပါတယ်
ဒီသွေးအက္ခရာတွေနဲ့ ရေးတဲ့စာဟာ
တော်လှန်ကဗျာ ဖြစ်တယ်။
ဒီည၊ နှစ်သစ်ကူးည
ဒီကဗျာကို ငါရွတ်မယ်။
သက္ကရာဇ်တွေဟာ တံစဉ်းတလက်လို
အချိန်ကို ရိပ်သိမ်းပြီးတဲ့နောက်
အညီမညာ ပြတ်ကျသွားတဲ့ နေ့ရက်တချို့ကို
ပြန်လည်စုဖွဲ့ဖို့
ပွင့်ဖက်တွေ ရိနွမ်းနေတဲ့ ငါ့အိမ်ရှေ့က
နှင်းဆီပင် ခြေရင်းမှာ
တစုံတရာကို ငါပြန်ရှာကြည့်မိတော့
နွေဦးရဲ့ သင်းရနံ့ကို ငါရတယ်
နွေဦးမှာ နိုးထလာမယ့် ဝိဉာဉ်ကို ငါတွေ့တယ်
နွေဦးကို ကြိုလင့်မယ့် နုပျိုခြင်းကို ငါပွေ့ဖက်မိတယ်။
နှစ်သစ်ဟာ မကြာခင်ရောက်လာတော့မယ်
သူနဲ့အတူ နွေဦးအောင်ပွဲ အတူယှဉ်တွဲလျက်။
12/31/2022
